| 1 | VIR die musiekleier. ’n Psalm van Dawid. |
| 2 | Mag die HERE u verhoor in die dag van benoudheid! Mag die Naam van die God van Jakob u beskerm! |
| 3 | Mag Hy u hulp stuur uit die heiligdom en u ondersteun uit Sion! |
| 4 | Mag Hy dink aan al u spysoffers en u brandoffer met welgevalle aansien! Sela. |
| 5 | Mag Hy u gee na u hart en al u voornemens vervul! |
| 6 | Ons wil juig oor u oorwinning en die vaandels opsteek in die Naam van onse God. Mag die HERE al u begeertes vervul! |
| 7 | Nou weet ek dat die HERE sy gesalfde verlos; Hy sal hom verhoor uit sy heilige hemel met magtige dade van verlossing van sy regterhand. |
| 8 | Sommige roem op strydwaens en ander op perde, maar óns sal roem op die Naam van die HERE onse God. |
| 9 | Húlle het inmekaargesak en geval, maar óns het opgestaan en ons weer opgerig. |
| 10 | HERE, verlos die koning! Mag Hy ons verhoor op die dag as ons roep! |
