| 1 | VIR die musiekleier; op die wysie van: „Lelies.” ’n Getuienis. Van Asaf. ’n Psalm. |
| 2 | O Herder van Israel, hoor tog; U wat Josef soos skape lei, wat bo-oor die gérubs troon, verskyn in ligglans! |
| 3 | Wek u mag op voor Efraim en Benjamin en Manasse, en kom ons te hulp! |
| 4 | O God, herstel ons, en laat u aangesig skyn, sodat ons verlos kan word! |
| 5 | o HERE, God van die leërskare, hoe lank nog rook u toorn by die gebed van u volk? |
| 6 | U het hulle tranebrood laat eet, hulle oorvloedig trane laat drink. |
| 7 | U het ons ’n voorwerp van stryd gemaak vir ons bure, en ons vyande drywe die spot. |
| 8 | O God van die leërskare, herstel ons, en laat u aangesig skyn, sodat ons verlos kan word! |
| 9 | ’n Wingerdstok het U uitgetrek uit Egipte; U het die nasies uitgedrywe en hom geplant. |
| 10 | U het voor hom plek gemaak, en hy het wortels geskiet en die land vervul. |
| 11 | Die berge was oordek met sy skaduwee, en met sy ranke die seders van God. |
| 12 | Hy het sy ranke uitgebrei tot by die see en sy lote na die Rivier toe. |
| 13 | Waarom het U sy mure stukkend gebreek, sodat almal wat met die pad verbygaan, hom kaalpluk? |
| 14 | Die wildevark uit die bos eet hom op, en wat roer op die veld, wei hom af. |
| 15 | O God van die leërskare, kom tog terug; aanskou uit die hemel en kyk, en gee ag op hierdie wingerdstok; |
| 16 | en wees ’n beskerming vir wat u regterhand geplant het, en oor die seun wat U vir Uself grootgemaak het. |
| 17 | Hy is met vuur verbrand, hy is afgekap; vanweë die dreiging van u aangesig kom hulle om. |
| 18 | Laat u hand wees oor die man van u regterhand, oor die menseseun wat U vir Uself grootgemaak het. |
| 19 | Dan sal ons nie van U afwyk nie; hou ons in die lewe, dan sal ons u Naam aanroep. |
| 20 | O HERE, God van die leërskare, herstel ons; laat u aangesig skyn, sodat ons verlos kan word! |
